ILOILO CITY – Magasugod na gid man subong nga adlaw, las 7:00 sa aga oras sa Israel (12:00 sa udto oras sa Pilipinas) ang ceasefire sa tunga sang Israel kag Hamas kag suguran ang pagbuya sang mga civilian hostages, las 4:00 sa hapon sa Israel (9:00 sa gab-o oras sa Pilipinas).
Ini ang gin-anunsiyo sang Qatar nga nagbulig kag nagpatunga agud nga mapatigayon ini nga labing-una nga ceasefire sa halos duha ka bulan nga gyera sa Middle East.
13 ka mga kababainhan kag mga kabataan ang buy-an suno sa spokesperson sang foreign ministry sang Qatar nga si Majed Al-Ansari.
Natalana man nga buy-an ang wala natumod nga numero sang Palestinian prisoners sa amo man nga oras, matapos nga mabuy-an ang mga hostages nagikan sa Gaza.
Suno kay Al-Ansari, indi masapubliko ang ruta sang mga buy-an nga hostages bangud sang safety reasons.
Sa tagsa ka adlaw, may yara sang pagwaon nga listahan sang hostages kag ihatag sa Israeli intelligence service nga Mossad nga amo man ang maga-turn over sang listahan sang Palestinian prisoners nga ginalauman nga buy-an sa mga Qataris.
Dugang pa niya, sa tion nga mabuy-an na ang mga hostages, i-turn over sila sa International Committee of the Red Cross.
Bilang balik, pahanugutan sang Israel ang “humanitarian pause” sa pagpang-atake kag buy-an ang pila sa mga Palestinian prisoners.
Una na nga ginpahayag ni Minister of State at the Foreign Ministry Mohammed Al-Khulaifi nga amo ang chief negotiator sang Qatar nga Huwebes magasugod ang truce.
Matandaan nga sang Oktubre 7 sang nagsalakay ang Hamas sa southern Israel, 240 ka mga bihag ang ila gindala sa Gaza.
Sa sini nga numero — apat pa lamang ang ila ginbuy-an nga amo ang mag-iloy nga American kag ang duha ka tigulang nga babayi.
Ginalauman naman nga madala sa buy-an ang duha ka Filipino hostages nga ginalakipan sang babayi nga may dual citizenship kag lalaki nga nakit-an sang iya asawa sa mga video nga ginbihag sang militante nga grupo.
