Nagalagas na sa tiyempo ang mga rescuers sa Japan agud indi na madugangan pa ang 73 ka mga tawo nga napatay kag masobra 400 nga nasamaran kasunod sang 7.5 magnitude nga linog nga nagtay-og sa amo nga pungsod kadungan sang imbukada sang 2024.
Suno kay Prime Minister Fumio Kishida, isa ini ka “critical” nga tion para sa tanan ilabi na bangud sa reports nga may mga tawo pa nga naipit sa nag-collapse nga mga building kag nagahulat sang rescue.
Bangud sini, triple-paninguha ang Japanese rescuers apisar sang mabatyagan nga aftershocks, mabaskog nga ulan, kag dalan nga nabalabagan sang mga debris.
Gin-doble man ang mga military personnel nga gin-deploy sa mga lugar nga nalinugan kag gindugangan man ang rescue dogs nga ginpadala.
Magluwas nga ginalantaw pa nga magataas ang numero sang casualties sa pungsod, may 33,400 pa subong ka tawo nga nagapabilin sa shelters. Ginabanta 200 man ka mga building ang nag-collapse.
Yara man sa 30,000 ka mga balay sa Ishikawa prefecture ang wala sang suplay sang kuryente kag masobra 110,000 ka mga puluy-an ang wala sang tubig.
Nahibaluan nga ang Noto Peninsula amo ang pinakanahalitan kasunod sang linog kag daw nahimo nga war zones ang port towns sang Wajima kag Suzu bangud puno sang lunang ang mga dalan, hapay ang mga balay, kag nagalulutaw ang mga sakayan.# (Kyodo News via AP)
