Nagdangat sa 103 ka mga tawo ang napatay sa duha ka magkasunod nga pagpamomba sa Iran kadungan sang pagkomemorar sang ika-apat nga anibersaryo sang pagpatay sang Estados Unidos sang Amerika sa Iranian kag Revolutionary Guards general nga si Qasem Soleimani.
15 ka minutos ang antad sang pagpamomba nga nag-igu malapit sa Martyrs Cemetery sa Saheb al-Zaman Mosque sa Kerman nga lugar nga ginda-an sang amo nga heneral nga napatay sa 2020 US drone strike sa Baghdad.
Gin-report man sang state media nga magluwas sa masobra 100 ka patay, may masobra 200 nga pilason kag pila diri ang kritikal ang kondisyon.
Sunod nga ginbasol sang Iranian supreme leader nga si Ayatollah Ali Khamenei ang ila “evil and criminal enemies” kag nagbuya nga magatimalos sila kasunod sang amo nga “terrorist attack”.
Wala pa sang nag-ako kun sin-o ang may kahimuan sa pagpang-atake apang ginakahangaw-an nga mas magapaibwal pa ini sang gamo sa Middle East magluwas pa sa gyera sa tunga sang Israel kag Hamas, ang militante nga grupo nga suportado sang Iran.
Natabo ini nga pagpamomba kasunod sang kamatayon man sang deputy leader sang Palestinian group nga Hamas bangud sang Israeli drone strike sa Lebanon.# (Mahdi Karbakhsh Ravari/Mehr News Agnecy via AP)
