Gin-ako sang Islamic State nga sila ang responsable sa duha ka magkasunod nga pagpamomba sa Iran kun sa diin 84 ka tawo ang patay kag madamo ang pilason.
Ginhimo ang pagpang-atake kadungan sa ikaapat nga anibersaryo sang kamatayon sang military commander sang Iran nga si Qassem Soleimani nga napatay sang US drone sa Iraq sang 2020.
Suno sa militante nga Sunni Muslim group, duha sa ila nga mga myembro ang naghaboy sang bomba sa mga tawo nga nagatilipon sa patyo sa syudad sang Kerman kag ginpatigayon ang ikaduha ang pag-atake kinse minutos ang makaligad.
Ginpahayag naman ni Iranian First Vice President Mohammad Mokhber nga dapat paabuton sang terorista nga grupo ang pagtimalos sang mga soldado sang Iran.
“Cruel criminals must know that they will be strongly dealt with from now on and undoubtedly there will be a harsh response,” suno naman sa statement ni Iranian Supreme Leader Ayatollah Ali Khamenei.
Ginkondena man sang United Nations Security Council ang amo nga “terrorist attack”.
Nagpanawagan man ang Iranian authorities sang mass protests sugod subong nga adlaw kadungan man sang lubong sang mga biktima sang amo nga pagpamomba.
