Nagsaka na sa 100 ang numero sang mga tawo nga napatay kasunod sang magnitude 7.6 nga linog nga nagtay-og sa Noto Peninsula kag sa kaiping nga mga lugar sa central Japan sa imbukada sang 2024.
Sa latest data sang gobyerno, 211 pa ka mga tawo ang missing samtang nga ginalagas sang rescuers ang tyempo agud nga maluwas ang posible dugang nga mga residente nga posible nagkalaipit sa natumba nga mga building sa Ishikawa Prefecture.
Ginalantaw nga mas mangin malala ang sitwasyon subong nga Domingo bangud sa ulan kag posible pag-yelo sa rehiyon.
Nagmandu naman si Prime Minister Fumio Kishida sa mga opisyal sang gobyerno nga dasigon ang pagpatigayon sang rescue operations agud mas madamo nga kabuhi ang maluwas.
Nabudlayan man ang otoridad sa pagdul-ong sang ayuda bangud guba ang mga dalan padulong sa Ishikawa kun sa diin 31,000 pa ka mga tawo ang nagatinir sa masobra 300 ka mga evacuation shelters.
Magluwas diri, nagakapuhag man ang mga tawo sa Noto region bangud sa aftershocks.# (Photo: Reuters)
