Masobra 10 ka kabataan sa Gaza ang nagaka-utdan sang isa ukon duha gid ka tiil kada adlaw halin sang nagsugod ang gyera sa tunga sang Hamas kag Israel sang Oktubre 7.
Ini sandig sa statement sang charity nga Save the Childen nga may reference sa statistics nga ginpaguwa sang United Nations.
Suno kay Jason Lee nga amo ang Country Director sang Save the Children sa Gaza, indi halos malaragway ang pag-antos sang mga bata sa Palestine — hitabo nga iya ginsiling nga isa ka “grave violation” kag dapat nga manabat ang may kahimuan.
Mangin ang eksperyensyado nga mga propesyunal kaangay sang mga doktor kag nurse suno kay Lee ang nagalalain bangud kinahanglan nga bulngon ang mga bata nga wala sang bastante nga equipment.
Ginhimo sang grupo nga reference ang statement ni UNICEF spokesperson James Elder sang Disyembre 19 nga ginabanta 1,000 ka kabataan sa Gaza ang nakumpol halin sang nag-ibwal ang inaway.
Nagsiling man ang World Health Organization nga kalabanan sa mga operasyon sa Gaza ang ginahimo nga wala sang anesthesia bangud kulang gihapon ang mga bulong kag medical supplies nga nagaabot sa strip.
Sulit-sulit nga ginpahayag sang Israel Defense Forces nga wala sini gina-target ang mga sibilyan apang ang militante nga grupo amo ang nagagamit sang mga civilian infrastructure kaangay sang ospital agud nga tamingan ang ila kaugalingon batok sa militar.
Una na nga ginpahayag sang Palestinian Ministry of Health sa Gaza nga 22,835 na ka Palestinians ang napatay kag masobra 58,000 ang nasamaran sa strip sa sulod na sang tatlo ka bulan halin sang natabo ang pagtimalos sang Israel. # (Photo: Arafat Barbakh/Reuters)
