Ginkaalarma sang United Nations ang nagasaka pa nga numero sang mga journalists nga napatay sa Gaza sa sulod sang tatlo ka bulan nga gyera sa tunga sang Israel kag Hamas militants.
Ang statement sang UN ang kasunod sang kamatayon sang duha ka Palestinian reporters sang Al Jazeera — sanday Hamza Wael Dahdouh kag Mustafa Abu Thurianga — nga naigu sang rockets sang Israel samtang yara sila sa ila nga salakyan sa Rafah.
Suno sa UN rights office, dapat nga may “independent” nga imbestigasyon sa pagpamatay sa journalists agud mahibaluan kun may istrikto man nga pagsunod sa international law.
Suno sa Committee to Protect Journalists nga naka-base sa New York, U.S.A., at least 79 na ka journalists kag media professionals ang napatay halin sang nagsugod ang gyera sa tunga sang Israel kag Hamas sang Oktubre 7.
Sa amo nga report, nakasaad nga Palestinians ang kadam-an sa sini nga mga biktima.
Kun balikan, sang nangibot ang Hamas kag nag-atake sa southern Israel sang Oktubre 7, yara sa 1,140 ang napatay — kalabanan mga sibilyan.
Nagtimalos ang Israel, ginsakop ang bilog nga Gaza, ginpudpod ang Hamas, kag subong — suno sa rekord sang Ministry of Health — lapaw na sa 23,000 ang ila nga napatay kun sa diin kalabanan amo ang mga kababainhan kag kabataan.#
