ILOILO CITY- Gin-ako sang mga transport cooperatives sa Iloilo nga nagapanglaghap sila sang mga piyesa sa tion nga nagakinahanglan sang repair ang ginabyahe nga mga modernized jeepney units.
Sa interview sang Bombo Radyo kay Mr. Rizalito Alido, pinuno sang Western Visayas Alliance Transport Cooperative Corporation Incorporated, iya ginpahayag nga
dako nga pagpanghangkat ini sa ila bangud kinahanglan pa nila nga mag-order sang piyesa sa Manila sa rason nga limitado lamang ang available nga piyesa sa Iloilo.
Suno kay Alido, magluwas nga dugang ini nga gasto sa ila, apektado man ang ila byahe bangud sa kalawigon sang paghulat antes matigayon ang pag-repair.
Pangabay niya nga kuntani mapangitaan sang paagi sang mga manufactures paagi sa ila mga dealers nga mas mangin accessible kag available sa Iloilo ang mga piyesa nga masami nila nga ginakinahanglan sa pag-repair sang salakyan.
