Ginsakaan sang armado nga kalalakinhan, ginkontrol, kag gindala sa direksyon sang Iran ang isa tanker nga pakadto kuntani sa Turkey, may karga nga krudo halin sa Iraq, kag may sakay nga 18 ka mga Pinoy seafarers kag isa ka Greek national.
Sa report sang Iranian state media, ginpahayag nga ang “Navy of the Islamic Republic of Iran” mismo ang may kahimuan sa amo nga “American oil tanker” sa Gulf of Oman — malapit sa Strait of Hormuz sa tunga sang Oman kag Iran.
Ang tanker nga involved sa insidente amo ang St. Nikolas nga amo man ang ginkumpiskar anay sang Estados Unidos sang Amerika sang nagligad nga tuig nga sang amo nga tion nagakarga sang langis halin sa Iran.
Nagaguwa man sa pahayag sang navy nga isa ini ka pagtimalos sang Iran bangud sa ginhimo sang Amerika sa amo man nga vessel sang 2023.
“After the theft of Iranian oil by the United States last year, St Nikolas tanker was seized by Iran’s Navy”, pahayag sang navy nga gin-cite sang Iranian news agency nga Fars.
Suno sa British maritime security firm nga Ambrey, pila ka armado nga lalaki ang nagtaklas sa tanker sang nahamtang ini sa 50 nautical miles east sang Sohar sa Oman, kag halin didto, gin-diretso ang vessel sa Bandar-e-Jask sa Iran.
Sang nakasakay na ang kalalakinhan sa vessel, ila gintabunan ang surveillance cameras kag sang ulihi, ginpatay ang tracking system.
Indi subong maathag kun ano ang sitwasyon sang 19 ka crew sang barko.
Suno naman sa TankerTrackers.com nga amo ang naga-track kag naga-report sang global shipments sang crude oil, may karga ang amo nga tanker nga “Iraqi oil” kag antes ini ginhingadlan nga St Nikolas, ang tanker ang may pangalan anay nga Suez Rajan.
Pahayag sang Ambrey, ini nga tanker ang gin-prosecute anay kag ginmultahan sang 2023 bangud sang pagkarga sang langis halin sa Iran nga sang ulihi gin-kumpiskar sang otoridad sa Estados Unidos sang Amerika.
Sang amo nga tion, nagpaandam ang Iran nga magabalos ini sa Amerika bangud sa amo nga insidente.
Nahibaluan nga ang gintabuan sang latest incident nga Gulf of Oman — mayor nga ruta sang oil industry nga amo ang nagaseparar sa Iran kag Oman — amo man ang lugar kun sa diin masami nagakatabo ang mga pagpang-atake kag pagpang-hijack halin pa sang nagliligad nga tinuig.
Ang US kag ang mga kaalyado sini ang nagsugod man sa pagpangdakop kag pagkontrol sang Iranian oil cargoes halin sang 2019 nga amo ang nagresulta sa serye sang mga pagpang-atake sa Middle East nga masami gina-angot sa Iran.# (Daisuke Nimura/Handout via REUTERS)
