ILOILO CITY- Nagpabutyag sang pagkabalaka ang World Food Programme sa posibilidad nga matabo ang tuman ka malala kag lapnagon nga tiggulutom sa Gaza.
Ini bangud tuman ka gamay gid lamang nga pagkaon ang nagaabot sa lugar humalin sang nagsugod ang away batok sa Israel.
Suno kay World Food Programme spokesperson Abeer Etefa, humalin sang nagsugod ang opensiba ang Israel bilang balos sa pagpang-atake sang Hamas militants sang Oktubre 7, yara sa 2.3 million nga populasyon ang nadulaan sang balay, nag-antos sang gutom, kauhaw kag kakulangan sa medical supplies.
Masobra 25,000 ka tawo ang napatay,base sa data sang Palestinian authorities, kag linibo ang ginapatihan nga nalubong sa nagkalawasak nga mga edipisyo.
Nahibaluan nga ang Northern Gaza ang gindalukan sang external aid sa sulod sang pila ka semana nga giyera samtang ang iban nga aid ang nagsulod sa south halin sa Egypt.
