Ginmanduan sang World Court ang Israel nga likawan ang akto sang genocide sa giyera sini batok sa Hamas kag dugangan ang tikang agud nga buligan ang mga sibilyan — apang talalupangdon nga wala sang direkta nga mandu nga magpatuman sang ceasefire.
Ang South Africa amo ang pungsod nga nagpasaka sang kaso sa International Court of Justice subong nga bulan agud hingyuon sa korte nga maghimo sang emergency measures agud mauntat na ang pag-inaway sa Gaza nga nagpatay na sang masobra 26,000 ka mga Palestinians.
Gin-akusahan man sini ang estado sang Israel nga nagakomiter sang genocide sa ila nga mga opensiba sang nagtimalos na ini sa pagpang-atake sang Hamas sang Oktubre 7 kag pagkidnap sang masobra 200 ka mga tawo.
Gin-akusahan man ang Israel nga naglapas sa 1948 United Nations Genocide Convention.
Sa desisyon naman sang korte, ginsiling sang mga huwes nga dapat himuon sang Israel sa kutob sang gahum sini nga malikawan sang ila militar ang pagkomiter sang genocide kag dapat nga may himuon nga lihok agud nga mapaayo ang sitwasyon sang apektado nga mga residente.
Apisar wala man sang mandu sa ceasefire, wala man ginbasura ang genocide case bangud ginalantaw ang Palestinians nga “protected group” sa idalom sang 1948 Genocide Convention.
Ginkalipay ni South African President Cyril Ramaphosa kag council sang governing party ang desisyon sang korte, samtang gintawag naman ini sang foreign ministry hailed nga isa ka “decisive victory”.
Wala naman ginbaton ni Israeli Prime Minister Benjamin Netanyahu ang desisyon kag gintawag ini nga “outrageous”.
Una na nga ginsiling ni Netanyahu nga wala sang bisan sin-o nga makapugong sa Israel — bisan pa ang The Hague kun sa diin naka-base ang korte ukon mangin ang “Axis of Evil”.#
