Ginpanginbulahan ni President Ferdinand ‘Bongbong’ Marcos, Jr. ang kontrobersyal nga anay heneral kag subong presidential candidate nga si Prabowo Subianto bangud sa pagpanguna sini sa inisyal nga resulta sang Indonesian elections.
Sa mensahe ni Marcos, ginsiling sini nga nagalaum siya nga mapadalom pa ang bilateral nga relasyon sang Pilipinas sa Indonesia.
Ini nga pungsod suno kay Marcos ang makabig nga suod nga partner sang Pilipinas sa Association of Southeast Asian Nations.
Importante gid suno sa iya nga palig-unon ang relasyon sa pinakadaku nga ekonomiya sa Southeast Asia ilabi na sa ika-75 nga tuig sang diplomatic relations sang duha ka pungsod subong nga 2024.
Ang 72-anyos nga si Prabowo amo subong ang defense minister sang Indonesia kag nakakuha sang 59.8 porsyento sang boto sang mga Indonesians base sa inisyal nga resulta.
Nakuha man sini ang suporta sang iya anay kasumpong nga si outgoing President Joko Widodo ilabi na bangud anak man ni Jokowi ang iya nga runningmate.
Si Prabowo amo ang military chief sang tion ni Suharto, ang anay diktador nga nagpamuno sa Indonesia sa sulod sang tatlo ka dekada.
Frontrunner ini sa eleksyon apisar pa sang rekord sini nga nalamhitan sang wala-tuo nga mga akusasyon sang pagpang-abuso sa kinamatarong sang mga tawo.
Napahalin ini anay sa militar bangud sa espekulasyon sa kidnapping kag pag-torture sa pro-democracy activists; na-exile sa Jordan; kag na-ban man anay sa pagtapak sa Estados Unidos sang Amerika.#
