Apisar pa nagguwa sa survey nga kadam-an sang mga Pinoy ang nagapabor nga mag-kooperar ang gobyerno sang Pilipinas sa imbestigasyon sang International Criminal Court (ICC) sa drug war sang anay Duterte administration, nagapanindugan gihapon si President Ferdinand Marcos, Jr. nga indi na magbag-o pa ang iya nga desisyon.
Ginsulit ni Marcos ang iya pagpang-alang-alang sa imbestigasyon ilabi na nga wala sang hurisdiksyon ang ICC sa Pilipinas.
“It opens a Pandora’s box. It’s still those questions of jurisdiction and sovereignty. I haven’t yet seen a sufficient answer for it. Until then, I do not recognize their jurisdiction in the Philippines,” suno sa presidente.
Suno kay Marcos, makapangita sang ebidensya ang korte apang indi man gihapon nila mapatuman ang ila mandu sa Pilipinas bangud wala na ini sang hurisdiksyon sa pungsod.
“No. It’s not about the evidence. It’s about the jurisdiction of the ICC in the Philippines. They could produce as much evidence as they want. But they could not act upon it in the Philippines, that is the point.”
Nahibaluan nga base sa separado nga surveys nga gin-conduct sang polling firms nga Social Weather Stations (SWS) kag OCTA, mas nagadamo na nga mga Pinoy ang nagapabor sa imbestigasyon sang amo nga korte nga naka-base sa The Hague, Netherlands.
Sandig sa resulta sang survey sang OCTA Research nga ginsapubliko sang Pebrero 18, 55% sang adult Filipinos ang nagapabor, samtang 45% naman ang nagapamatok sa paghatag sang suporta sa imbestigasyon sang korte.
Suno sa survey, ang may pinakamataas nga nagapabor amo ang Balance Luzon nga may 65% samtang ang pinakamanubo naman nga naghatag sang suporta amo ang Mindanao nga may 42%.
Sa Bicol Region ang may highest approval sa kooperasyon nga may 79% samtang ang rehiyon naman sang Davao nga hometown ni anay Presidente Rodrigo Duterte ang naghatag lamang sang sais porsyento nga suporta.
Ginpatigayon ang survey sang nagligad nga Disyembre 10-14, 2023 gamit ang face-to-face interviews sa 1,200 ka Filipino adults nga may margin of error nga 3% para sa national percentages kag 6% para sa regional breakdowns.
Sandig sa opisyal nga numero, masobra 6,000 ka mga tawo ang ginpangpatay sa idalom sang war on drugs sang Duterte administration apang kun lantawon ang pahayag sang human rights groups, nagalapaw sa 30,000 ang numero sang nagkalamatay.#
