Na-guwa sa resulta sang isa ka survey nga ang Department of Education (DepEd) amo ang pinaka-ginasaligan nga ahensya sang gobyerno samtang ang Department of Social Welfare and Development (DSWD) amo ang best performing.
Suno sa OCTA Research survey sang katapusan sang 2023, ang DepEd ang nakaangkon sang 84% trust rating nga 5% nga mas mataas ipaanggid sa 79% rating nga nakuha sini sang third quarter sang 2023 kun sa diin ini man ang ginkilala nga most trusted agency.
Ang nagasunod sa DepEd amo ang Commission on Higher Education (CHED) nga may 83%, DSWD nga may 82%, ang Department of Health (DOH) nga may 80% kag ang Department of Public Works and Highways (DPWH) nga 75%.
Ini nga lima ka mga ahensya amo man ang yara sa top-performing agencies kun sa diin nagpanguna naman ang DSWD nga may 86%.
Kaangay sang nagligad nga survey, ang mataas sa trust and performance ratings sa government offices ang na-rekord sa Visayas kag Mindanao.
Ang Department of Transportation (DOTr) kag ang Department of Trade and Industry (DTI) naman ang may pinakamanubo nga trust ratings nga may 19% kag 16% ang mga ini.
Ang data sa sini nga survey ang nakuha paagi sa face-to-face interviews sa masobra 1,200 respondents edad 18 pasaka halin sang Disyembre 10-14,2023 nga may ±3% margin of error sa 85% confidence level.#
