Ginsapubliko sang Department of Foreign Affairs (DFA) nga ginhilway na sang Iran ang isa sa 18 ka mga Filipino seafarers nga sakay sang oil tanker nga ginbanggaan kag gindala sang Iranian authorities halin sa Gulf of Oman sang nagligad nga bulan.
Suno kay Foreign Affairs Undersecretary for Migrant Workers Affairs Eduardo de Vega, nakapauli na ini sa Pilipinas sang nagligad nga Pebrero 14.
Pahayag ni De Vega, ginpapauli ang amo nga seaman bangud siya lang ang isahanon sa 18 ka mga Pinoy nga wala nagbaton sang double salary.
“Ang nangyari po kasi kaya siya pinalaya kasi siya lang iyong kaisa-isa sa 18 na hindi tumanggap ng double salary,” suno sa opisyal.
Ginpahayag man ni De Vega nga normal lang ang pag-tratar sa mga personnel nga sakay sa oil tanker kag wala man sila ginakabig mga hostages.
Malapit naman nga mag-expire ang kontrata sang 10 ka Pinoy seafarers nga yara sa amo nga oil tanker kag ginalauman nga makabalik man sila sa Pilipinas.
Matandaan nga Enero 11 sang pakadto kuntani sa Turkey ang oil tanker apang ginbanggaan sang Iran sa Gulf of Oman.
Ang pagsakop sang Iran sa amo nga tanker nga St. Nikolas ang ginakabig nga pagtimalos sini sa Estados Unidos sang Amerika nga amo ang una nga nagkumpiska sa amo man nga vessel kag sa langis nga karga sini sang nagpatigayon sila sang sanction enforcement operation sang nagligad nga tuig.#
(Photo: Arab News)
