Gin-anunsyo sang Department of Justice (DOJ) nga duha ka alert list orders ang ginpaguwa batok kay anay Negros Oriental Representative Arnolfo “Arnie” Teves Jr. nga amo ang gina-alegar nga mastermind sa pagpatay kay anay Negros Oriental Governor Roel Degamo.
Suno kay Justice Secretary Jesus Crispin Remulla, ang alert list orders amo ang magalimita sang hulag ni Teves kag mangin paagi man agud nga maaresto ini sa bulig man sang iban nga pungsod.
Paagi sa sini nga mga mandu, ang tanan nga opisyal sang Bureau of Immigration (BI) ang dapat nga mag-report gilayon sa Philippine National Police (PNP) ukon sa National Bureau of Investigation (NBI) kaangot sa tanan nga impormasyon sang pagsulod, pagguwa, ukon anuman nga hulag ni Teves sa pungsod.
Ginmanduan man ang immigration agents nga itudlo si Teves sa otoridad bisan makit-an lamang ini sa diin man nga port of entry.
Ini nga orders suno kay Remulla ang naangot pa sa warrant of arrest nga ginpaguwa sang korte sa Manila batok kay Teves kag iban pa nga indibidwal sang Septyembre 2023 bangud sa gin-alegar nga pagpatay sini kay Degamo.
Ang mandu ang kasunod man sang Interpol Blue Notice nga ginbalhag sang Pebrero.
Kun matandaan, sang nagligad lamang nga semana, may yara man sang korte sa Manila nga nagmandu man sa kanselasyon sa passport sang anay mamalidha.
