Nagsabat ang Chinese Embassy sa Pilipinas nga sala ang reports nga nagasiling nga ang China ang nagaguba sang marine environment sa West Philippine Sea.
Suno sa embahada, halin sang una tubtub subong, ginapabaloran gid sang ila nga pungsod ang paghatag sang proteksyon sa palibot sang Nansha Islands kag Reefs kag sa kadagatan malapit diri.
Gindugang sini nga gina-monitor man nila ang nagakatabo sa amo nga area sandig sa domestic kag international laws.
Kabay pa suno sa embahada nga respetuhon man kun ano ang kamatuoran kag indi na magpabulag-bulag sa binutig nga mga taktika kaangay sang report nga ini.
“It is hoped that relevant parties will respect the facts and not be misled by untruthful media tactics,” pahayag sang embassy.
Ini nga sabat sang China ang nagguwa kasunod sang report nga may US think tank nga Center for Strategic and International Studies nga naga-saad nga halin sang 2012, involved ang China sa paghalit sa marine biodiversity kag coral reefs sa rehiyon amo man ang pagpangkuha sang dalagku nga kabibe.
Suno sa Asia Maritime Transparency Initiative sang Center for Strategic and International Studies, 4,500 ektarya sang coral reefs ang naguba bangud sa artificial island-building sang China sa ginaagawan nga teritoryo.
Ginpahayag nga nakit-an man nga may dugang nga 16,300 ka ektarya sang coral reefs nga nahalitan bangud sang pagpang-harvest sang Chinese fishermen sang dalagku nga mga kabibe.
Ginpahayag man nga dinekada pa ang kinahanglan agud nga maka-recover ang mga reefs kasunod sang daku nga halit nga naagyan sini.
Antes sini, nagpahayag man ang National Task Force on the West Philippine Sea nga imbestigaran sang otoridad ang gina-alegar nga paggamit sang Chinese fishermen sang cyanide kun sila ang yara sa Bajo de Masinloc.#
