ILOILO CITY- Magabiya na subong nga adlaw si President Ferdinand R. Marcos Jr. padulong sa Canberra, Australia agud labi nga pabaskugon pa ang kooperasyon sa tunga sang Pilipinas kag Australia.
Suno kay Department of Foreign Affairs Spokesperson Ma. Teresita Daza, si Presidente Marcos ang magapatigayon sang Guest of Government visit sa Australia sa Pebrero 28-29 kasunod sang imibtasyon ni Governor General David Hurley.
Suno kay Daza,ang pagbisita ni Marcos ang nagatuyo nga pabakuron ang strategic partnership nga nagaduso sang pag- uswag kag kalinong.
Sa amo nga pagbisita, ginalauman nga maghatag sang mensahe si President Marcos sa parliament of Australia.
Si President Marcos ang pinakauna nga Philippine President nga magahambal sa Australian Parliament.
May yara man ini sang pormal nga pagpakighinun-anon may kaangtanan sa mga areas of cooperation kag regional issues kalakip na ang isyu sa West Philippine Sea upod sa Australian senior officials nga nagalakip kay Governor General Hurley, Prime Minister Anthony Albanese, kag iban nga Australian Parliamentary leaders.
Ang pagbisita ni Marcos sa Canberra ang una nga hugnat sang pagbisita ni Marcos sa Australia bangud nga magapartisipar man ini sa ASEAN-Australia Special Summit sa Marso 4-6, 2024, sa imbitasyon ni Prime Minister Albanese.
