ILOILO CITY- Ginpamatbatan sang Supreme Court si Public Attorney’s Office (PAO) chief Persida Acosta nga guilty sang indirect contempt.
Suno sa korte suprema, unanimous ang mga mahistrado sa desisyon nga pamatbatan si Acosta nga guilty sang indirect contempt bangud sa paglapas sa section 3(d), rule 71, sang Rules of Court, kag grossly undignified conduct prejudicial to the administration of justice sa idalom sang section 33, canon VI sang Code of Professional Responsibility and Accountability ang bag-o nga code of conduct para sa mga abogado.
Si Acosta ang ginmanduan man nga magbayad sang P30,000 para sa indirect contempt kag P150,000 para sa grossly undignified conduct prejudicial to the administration of justice kag may hugot nga paandam nga kun suliton sini ang kaangay nga mga opensa, mahimo siya mangatubang sang mas mabug-at nga silot.
Nakit-an nga guilty si Acosta bangud sa iya nangin lihok nga nahulog sa “improper conduct tending, directly ukon indirectly, agud i- obstruct ukon i- degrade ang administration of justice.
Natumod nga ang mga pahayag ni Atty. Acosta sa iya Facebook page nga accessible sa publiko ang nakitaan sang indi maayo nga intensyon kag malisya sa korte.
Suno sa pinakamataas nga hukmanan, natumod man sang korte nga ang paglunsar ni Acosta sang public campaign batok sa bag-o nga conflict of interest rule para sa Public Attorney’s Office gamit ang public attorneys kag staff kag kliyente sang opisina kag ang pagbalhag sang kaundan sang sulat sang Public Attorneys’ office para kay Chief Justice Alexander G. Gesmundo nga nagahingyo sang pagpanas sang amo nga rule, gintuyo ni Atty. Acosta nga engganyuhon ang publiko nga i-pressure ang korte nga magdampig sa iya posisyon.
Ang desisyon sang Supreme Court batok kay Acosta ang nag-ugat gikan sa pagpamatok sini sa conflict of interest rule sa new lawyers’ code of conduct, nga nangin section 22, canon III sang Code of Professional Responsibility and Accountability .
Sa sulat nga naka- address kay Chief Justice Alexander Gesmundo, gina-claim sang opisina ni Acosta nga ang bag-o nga probisyon ang nagapahanugot sa duha ka lawyers sang Public Attorney’s Office nga i-represent ang nagakontrahanay nga kampo sa mga kaso sa korte.
Antes ang resolusyon sa kaso ni Acosta, una na ginmando sang korte suprema sang nagligad nga tuig sa duha ka mga kahigayunan, nga ipaathag sini ang iya mga tirada batok sa bag-o nga Code of Professional Responsibility and Accountability.
Sang ulihi, nagpangayo man sang pasaylo si Acosta sa High Court.
Magluwas kay Acosta, ginpamatbatan man sang Supreme Court si Public Attornery’s Office forensics unit director Erwin Erfe nga guilty sang indirect contempt bangud sa pag-akusa sa Supreme Court sang judicial tyranny.
