ILOILO CITY- Ginmando sang Malacañang ang pag-dismiss sa serbisyo sang assistant solicitor general matapos nadiskubrehan nga “administratively liable” ini bangud sa sexual harassment sa duha ka mga legal interns.
Sa 22 ka pahina nga desisyon, gin-dismiss sang Office of the President si assistant solicitor general Derek Puertollano matapos natudlan sa kaso nga ginpasaka sa iya kaangot sa pagpanghurikap sang pribado nga parte sang lawas sang mga biktima.
Base sa panaysayon sang biktima, magkaupod sila ni Puertollano sa Cebu City agud mag- obserbar sa isa ka hearing sang 2022 kun sa diin nagdesisyon si Puertollano nga magtinir sila sa iya nga kwarto samtang ginahitso pa ang ila akomodasyon.
Samtang nagapatuyo ang isa ka biktima, gin-alegar nga ginhikap ni Puertollano ang iya hita.
Pagkasunod nga adlaw, ginpahayag nga nagsulod si Puertollano sa bathroom kun sa diin nagapaligo ang isa ka biktima kag samtang nagailis, ginhikap sini ang pribado nga parte sang lawas sini.
Ginpanginwala naman ni Puertollano ang mga alegasyon batok sa iya.
Sa pihak sini, indi kumbinsido ang Office of the President sa paathag ni Puertollano.
