ILOILO CITY- Lunsay mga lalaki ang mga napatay nga tatlo ka mga katapo sang rebelde nga grupo nga naka-engkwentro sang militar sa Barangay Torocadan, San Joaquin, Iloilo.
Ang mga napatay ang ginabanta nagaedad sang 25 tubtob 40 anyos.
Duha sa mga napatay ang gindala sa Arnulfo Cabardo Sumagpao Funeral Homes sa Sta. Barbara samtang ang isa ang gindala naman sa Cescar Funeral Homes sa Miagao.
Sa interview sang Bombo Radyo kay Jericho Seduco, helper sang punerarya sa Miagao kag isa sa mga indibidwal nga nagsulod sang mga lawas sang mga rebelde sa cadaver bag, iya ginpahayag nga sa duha sa mga napatay nga gindala sa punerarya sa Sta. Barbara, isa diri ang indi na makilala bangud wasak ang guya sini samtang ang isa naman ka rebelde ang may mga samad sa tiyan.
Suno kay Seduco, ang lalaki naman nga gindala sa ila punerarya ang mahapos lang ma- identify.
