Nagpasalig si President Ferdinand Marcos, Jr. nga lain-lain nga mga pamaagi ang himuon sang gobyerno sa tunga sang epekto sang El Niño phenomenon sa pungsod.
Suno sa presidente, na-obserbaran nga samtang nagamala ang duta sa Luzon kag Visayas — ilabi na sa Western Visayas — bangud sa tuman nga init, nagabaha naman sa Mindanao bangud sa amo nga weather phenomenon.
Bangud lain-lain ang epekto sang sini nga problema, lain-lain man ang response suno kay Marcos.
“Well, Mindanao has a different effect of the El Niño, in various ways. Although up in Luzon and the Visayas, especially Western Visayas, we have a very very large effect of drying up in water supply. Dito naman, dito sa South, nagkakabaha naman tayo. So, we have a different response. So, we will continue to do that,” suno kay Marcos.
Hatagan prayoridad suno sa iya ang pagtukod sang mga imprastraktura agud masigurado ang suplay sang preska nga tubig para sa irigasyon sa agrikultura kag pagpangisda.
Una na nga ginpahayag sang Philippine Atmospheric, Geophysical and Astronomical Services Administration (PAGASA) nga mahimo ma-eksperyensyahan na ang drought sa 30 ka mga lugar sa Pilipinas sa katapusan sang Marso bangud sa tuman nga init kag ginakulang gid sa tubig halin pa sang Oktubre 2023.
Matabo ang drought kun may tatlo ka sunod-sunod nga bulan nga tuman ka talagsa ukon indi normal ang pag-ulan ukon may 60% nga buhin ipaanggid sa nakaandan nga bubo sang ulan.
25 ka areas ang natumod sa Luzon kag lima naman sa Visayas.
Lakip sa namensyonar amo ang Abra, Apayao, Aurora, Bataan, Benguet, Cagayan, Cavite, Ifugao, Ilocos Norte, Ilocos Sur, Isabela, Kalinga, La Union, Laguna, Mountain Province, Nueva Ecija, Vizcaya, Occidental Mindoro, Oriental Mindoro, Palawan, Pangasinan, Quirino, Rizal kag Zambales.
Sa Visayas, ang ginhingadlan amo ang Antique, Guimaras, Iloilo, Leyte, kag Negros Occidental.#
