ILOILO CITY- Gilayon nga nagpakigsugilanon ang Estados Unidos sang Amerika sa Pilipinas kasunod sang pinakaulihi nga akto sang probokasyon sang China sa West Philippine Sea.
Ginkumpirma ini ni United States of America State Department spokesperson Matthew Miller matapos gin-harass kag ginbungguan sang Chinese maritime militia kag coast guard ships ang mga barko sang Pilipinas.
Suno kay Miller, nagatindog ang United States kaupod ang kaalyado nga Pilipinas sa tunga sang delikado kag wala nagakabagay nga akto sang China.
Kahapon sang ginkumpirma ni Commodore Jay Tarriela, spokesperson sang Philippine Coast Guard nga samtang nagapatigayon sang resupply mission sa BRP Sierra Madre ang BRP Cabra kag BRP Sindangan, ginbungguan sang China Coast Guard ang mga barko sang Philippine Coast Guard sa Ayungin Shoal.
Ini ang may kalayuon nga 105 nautical miles sa nakatúndan sang Palawan.
Suno kay Tariella, bangud sa pagbunggo sang China Coast Guard 21555 sa BRP Sindangan, nag-angkon sang ‘minor structural damage’ ang barko sang pungsod.
