ILOILO CITY- Ginapatigayon subong nga adlaw ang pinakadako nga balloting sa Democratic kag Republican presidential nominating elections sa Estados Unidos sang America.
Minilyon ka mga Americans sa 15 ka mga estado kag American Samoa ang magaboto subong nga adlaw nga ginbansagan Super Tuesday didto sa U.S.
Sanday President Joe Biden kag former President Donald Trump ang ginalauman nga magdaug gikan sa ila tagsa ka partido padulong sa eleksyon sa Nobyembre sa liwat nila nga pag-atubangay.
Ang 77- anyos nga si Trump ang handom nga mapabakod ang iya pag-uyat sa Republican presidential nomination paagi sa pag- sweep sa Super Tuesday primaries agud mas mapalapit sa handom nga makabalik sa White House.
Kinahanglan ni Trump sang 1,215 delegates gikan sa 2,429 delegates agud magdaug sa nomination.
Ang 81- anyos naman nga si Biden ang gina-challenge sang indi kilala nga mga outsiders gani ang iya re-nomination ang isa na lang ka pormalidad kag pat-ud na ang iya kadalag-an sa Democratic Party.
Kinahanglan ni Biden sang 1,968 delegates gikan sa 3,934 total delegates agud magdaug man sa nominasyon.
Ang delegates amo ang mga tawo nga gin- authorize nga magboto on behalf sang iban nga botante kun sa diin sila ang gin-elect sang mga voters agud mangin electors sa electoral college nga amo naman ang maga- elect sang presidente.
