Nakabalik na si President Ferdinand ”Bongbong” Marcos, Jr. kag ang bug-os nga delegasyon sang Pilipinas halin sa pagtambong sa Association of Southeast Asian Nations – Australia Summit.
Naghugpa ang eroplano nga sakay sanday Marcos sa Villamor Air Base 11:33 p.m. kagab-i, Marso 6.
Dala-pauli sang presidente ang 12 ka business agreements ukon investments balor $1.53 billion ukon katumbas sang P85.4-billion matapos nga naselyuhan ini sang Pilipinas kag Australia sa sidelines sang amo nga special summit.
Lakip diri suno sa presidente ang magadala sang trabaho sa energy, Information Technology and Business Process Management, housing, imprastraktura, kag health sector.
Lakip sa ginpasalamatan ni Marcos sa Australia amo ang padayon nga suporta sa rule of law, sa 1982 United Nations Convention on the Law of the Sea (UNCLOS), kag sa 2016 Arbitral Award nga nagapabor sa Pilipinas kag naga-imbalido sa pag-claim sang China sa West Philippine Sea.
