Matabo gid ang madugay na nga ginalauman kag ginakalangkagan nga maragtason nga rematch sa tunga nanday United States President Joe Biden kag anay US President Donald Trump sa general election sa Estados Unidos sang Amerika sa maabot nga Nobyembre.
Ini matapos pareho nga nagdaog sa nomination contests sa ginbansagan “Super Tuesday” kun sa diin nagboto ang mga tawo sa 15 ka mga estado sa ila nga nominee para sa pagka-presidente.
Wala man lang ginbalhasan si Trump sa paglutos kay anay South Carolina Governeor kag anay U.N. Ambassador Nikki Haley kun sa diin nadag-an sini ang 14 sa 15 ka states lakip ang Alabama, Arkansas, California, Colorado, Maine, Massachusetts, North Carolina, Oklahoma, Tennessee, Texas, Minnesota kag Virginia.
Wala sang sweep nga natabo bangud daog si Haley sa estado sang Vermont.
Nangin presumptive nominee si Trump sang Republicans matapos nga opisyal nga nag-suspinde si Haley sang iya nga presidential campaign.
Ginpanginbulahan sini si Trump apang wala niya ini gin-endorso. Ginsiling man sini nga wala siya sang paghinulsol sa iya pagkampanya sa pagka-presidente.
Sa speech naman ni Trump, ginlaslasan na sini si Biden kag gintawag nga worst president sa maragtas sang Estados Unidos sang Amerika.
Madasig naman nga kadalag-an ang naangkon sang Democrat nga si Biden sa 14 states lakip sa Minnesota kun sa diin nangatubang ini sa protesta. Nalutos naman ini sa US territory nga American Samoa.
Ini nga rematch sa tunga sang 77-anyos nga si Trump kag 81-anyos nga si Biden amo ang labing-una nga una nga pagsulit sang US presidential matchup humalin sang 1956.
