Nalakip ang 15 ka mga Pinoy sa crew sang isa ka panibag-o nga barko nga gin-igu sang antiship ballistic missile sa Gulf of Aden.
Sa amo nga insidente, sandig sa inisyal nga report, duha ka seafarers ang patay, anum ang naka-agom sang seryoso nga mga samad bangud sa pagkasunog samtang tatlo naman ka iban pa ang missing apang wala pa ginkumpirma kun ano ang ila nga nationalities.
Suno sa Greek Operator sang barko nga True Confidence, naigu sang missile ang barko sang yara ini sa 50 nautical miles southwest sang Yemeni port sang Aden rason nga nagkarab-karab gilayon ang kalayo.
Suno sa amo nga source, wala pa sang available nga impormasyon sa status sang 20 ka crew kag tatlo ka armado nga guwardiya sa sulod sang vessel nga ginalakipan sang 15 ka mga Pinoy, apat ka Vietnamese, duha ka Sri Lankans, isa ka Indian kag isa ka Nepali national.
Nag-isyu naman sang statement ang rebelde nga Houthis nga sila ang may kahimuan sa pagpalupad sang missile.
May shipping source man nga nagsiling nga nagaguwa subong nga gin-abandonar na lamang ang vessel — pareho man sa impormasyon nga ginpaguwa sang United Kingdom Maritime Trade Operations agency.
Nahibaluan nga sunod-sunod nga pagpang-atake ang ginahimo sang Houthi rebels paagi sa pagpalupad sang drones kag missiles batok sa international commercial shipping halin pa sang tunga-tunga sang bulan sang Nobyembre.
Ila ginpahayag nga kabahin ini sang ila nga pagdampig sa Palestine bangud sa pagpang-atake nga ginahimo sang militar sang Israel sa Gaza.
Ini ang ginakabig pinaka-seryoso nga nahalitan bangud sa na-rekord nga mga nasamaran kag napatay.
Base sa impormasyon, ang barko nga True Confidence ang ginapanag-iyahan sang Liberian-registered company nga True Confidence Shipping kag gina-operate sang kumpaniya nga Third January Maritime nga naka-base naman sa Greece.
(Photo:Dario Bonazza/via REUTERS)
