Liwat kag pormal nga nanindugan ang mga abogado sang gina-alegar sex offender nga si Pastor Apollo Quiboloy nga indi ini involved sa management kag operations sang Sonshine Media Network International (SMNI) halin pa sang ulihi nga quarter sang 2018.
Sa sulat kay House committee on legislative franchise head Rep. Gus Tambunting, ginpahayag sang legal counsel nga nagapungko lamang ang pastor bilang “honorary chairman” sang network.
Sabat ini sang kampo sang pastor bangud sa subpoena nga gin-isyu bangud wala ini nagsipot sa mga hearings sang committee kaangot sa ginaalegar nga mga violations sang Swara Sug Media Corporation nga amo ang holder sang prangkisa sang SMNI.
Ginsaad man sa sulat nga si Quiboloy nga founder sang Kingdom of Jesus Christ ang indi mahimo makasabat sang mga pamangkot sa committee hearing sa March 12, gani may ipadala lamang nga mga tawo nga amo sanday current Executive Pastor of the Kingdom of Jesus Christ Marlon Acobo kag duha sa iya nga staff members.
Antes sini, pila na ka mga myembro sang Kamara ang nagpaandam nga posible i-pa-cite in contempt man sang House Committee on Legislative Franchises si Quiboloy kun indi man gihapon ini magpakita sa hearing sa Kamara sa masunod nga semana.
Kun matabo, halos pareho ini sa natabo sa Senado kun sa diin gin-move man sang panel head nga si Senator Risa Hontiveros nga ipa-contempt kag ipaaresto ang pastor bangud sa pagbalewala sa hearing sang Kongreso.
