ILOILO CITY- Nag-suspend sang klase subong nga adlaw ang mga eskwelahan sa tatlo ka mga syudad sa Western Visayas bangud sa tuman ka init nga tiempo.
Sa interview sang Bombo Radyo kay Mr. Hernani Escullar Jr., spokesperson sang Department of Education Region 6, iya ginpahayag nga ini ang ginalakipan sang Bacolod City, Kabankalan City, kag Silay City sa Negros Occidental.
Suno kay Escullar, mismo ang mga local chief executives sang nasambit nga mga syudad ang nagpagwa sang amo nga desisyon.
Apang gin-athag niya apisar nga suspended ang in- person classes, nag-provide gihapon sang alternative delivery mode sa mga estudyante agud padayon gihapon ang ila pagtuon.
Pahayag niya, sa subong, nagahulat sila sang opisyal nga guidelines halin sa Central Office agud mahimo nga basehan kun magdesisyon ang mga eskwelahan nga mag-suspend sang klase.
Dugang sang natungdan, mahimo naman nga magpakig-angot ang mga school heads sa division offices kun may yara sila sang plano nga mag-suspend sang in- person classes.
