ILOILO CITY- Liwat nga ginlaslasan ni anay Presidente Rodrigo Duterte si Pres. Ferdinand Marcos Jr. bangud sa ginaalegar plano nga bag-uhon ang konstitusyon para mapalawig ang iya nga termino.
Kadungan ini sang ginpatigayon nga prayer rally sa Liwasang Bonifacio bilang suporta kay Pastor Apollo Quiboloy sang Kingdom of Jesus Christ nga nagapangatubang sang congressional inquiries kag sa Sonshine Media Network International.
Suno kay Duterte, luyag ni Marcos nga suliton ang ginhimo sang iya amay nga si Ferdinand E. Marcos Sr. pila ka dekada na ang nakaligad.
Pahayag ni Duterte, basta Marcos ang nagapungko nga presidente, ginahilabtan gid ang konstitusyon.
Gintawag pa niya ini nga isa ka sahi sang pagpangbaboy.
Gina-engganyo man niya ang mga tawo nga indi pagtugutan ang amo nga plano ni Marcos.
Sa bahin naman ni Senator Robin Padilla nga yara man sa prayer rally, nagpahayag naman ini sang iya bug-os nga suporta kay Quiboloy bilang kabalaslan niya sa nangin suporta man sang pastor sa iya.
Pahayag ni Padilla, si Quiboloy ang nagapakigbato nga tapuson na ang armed struggle sa Pilipinas kag mapaluntad ang law and order gani indi niya pagbayaan ang self- proclaimed Appointed Son of God.
