ILOILO CITY- Nagpagguwa sang official statement ang West Visayas State University kaangot sa ginapahayag nga nag-leak nga test questionnaire sa nagligad nga College Admission Test.
Sa post sang isa ka netizen, ginphayag sini nga nagkuha sang entrance exam sang nagligad nga semana ang iya utod nga babaye apang sang amo nga adlaw, may naggwa nga impormasyon nga may mga estudyante nga nagkuha sang exam nga ginatun-an ang mga questionnaires nga ang unod amo man ang naggwa sa exam nga ila ginkuha.
Suno sa netizen,dismayado ini kag gintawa nga indi ini patas kag makaguba ini sa integridad sang institusyon.
Sa pagpakig-angkot naman sang Bombo Radyo kay Dr. Joselito Villaruz, Presidente sang unibersidad, iya ginpahayag nga gilayon niya nga ginmando ang pag-imbestigar sa amo nga isyu agud matul-id ang kamatuoran sa amo nga alegasyon.
Suno kay Villaruz, ginalantaw man niya ang posibilidad nga may mga tawo lamang nga luyag higkuan ang integridad sang institusyon para sa ila personal nga mga interes.
Sa pihak sini, luyag sa gihapon padalman ni Villaruz ang amo nga butang kag kun mapamatud-an nga may natabo gid man nga leakage sang test papers, masiguro nila nga indi na ini matabo liwat.
