Ginklaro sang Department of Social Welfare and Development (DSWD) nga indi na mahimo maka-avail sa Food Stamp Program ang kutob sa mga benepisyaryo sang Pantawid Pamilyang Pilipino Program (4Ps).
Suno kay DSWD Assistant Secretary for Innovations Baldr Bringas, nakabutang ini sa provisions kun sa diin exempted ang 4Ps nga maka-avail sa P1.89 billion nga pondo nga ginpain para sa “Walang Gutom 2027: Food Stamp Program” sa idalom sang General Appropriations Act (GAA).
Matandaan nga sang Hulyo 2023, ginsuguran na sang DSWD ang anum ka bulan nga pilot implementation sang Food Stamp Program sa tuyo nga mabuligan ang mga ginagutom nga mga Pilipino.
Sa idalom sini nga programa, magahatag ang ahensya sang electronic benefit transfer (EBT) cards nga sudlan sang food credits nga magadangat sa P3,000 kada bulan. Amo ini ang gamiton agud nga magbakal sang pili nga mga lista sang food commodities halin sa DSWD-registered ukon -accredited retailers.
Kadam-an sa covered sang food credits amo ang mga produkto nga manggaranon sa carbohydrates kaangay sang bugas (P1,500); 30% para sa proteins kaangay sang karne (P900); kag 20% para sa prutas, vegetables, oil, salt, kag condiments (P600).
Una man nga ginpahayag sang DSWD nga matabo ang full implementation sang flagship program sa Hulyo 2024. May mga kondisyon para sa mga benepisyaryo sa idalom sang food stamp program lakip na ang pagtambong sa nutrition classes kag dapat nga may isa nga employed family member nga makapaidalom sa skills upgrade training sa idalom sang Department of Labor and Employment (DOLE) ukon Technical Education and Skills Development Authority (TESDA).
