Nagsaka ang net satisfaction rating ni President Ferdinand “Bongbong” Marcos sa bilog nga pungsod — magluwas lamang sa Mindanao.
Base sa national survey sang Social Weather Stations (SWS) nga ginpatigayon halin sang Disyembre 8-11, 2023, nakakuha si Marcos sang +47 (65% satisfied minus 18% dissatisfied) nga mas mataas sang gamay ipaanggid sa +44 nga iya nakuha sang Septyembre 2023.
Ang pinakamataas nga net satisfaction rating sang presidente amo ang sa Balance Luzon nga very good +52; ginasundan sang Visayas nga very good +51; Metro Manila nga good +44; kag Mindanao nga good +38.
Kun ipaanggid sa resulta sang nagligad nga Septyembre 2023, ini nga rating ni Marcos sang Disyembre 2023 ang nagsaka sang 8 points halin sa +36 sa Metro Manila; 4 points halin sa +48 sa Balance Luzon; kag 18 points halin sa +33 sa Visayas.
Apang sa Mindanao, nagnubo ang presidente sang 12 points halin sa nauna na-rekord nga +50 sang Septyembre 2023.
Ginpatigayon ang Fourth Quarter 2023 SWS Survey paagi sa face-to-face interviews sa 1,200 adults (18-anyos pasaka) sa bilog nga pungsod kun sa diin may tag-300 sa kada isa sa Metro Manila, Balance Luzon (ukon Luzon sa guwa sang Metro Manila), Visayas, kag Mindanao.
Non-commissioned ini nga survey. Ang sampling error margins amo ang ±2.8% para sa national percentages, kag ±5.7% sa kada isa sa Metro Manila, Balance Luzon, Visayas, kag Mindanao.#
