Nahimo na nga layi ang pag-ban sang ‘no-permit-no-exam’ policy sa Pilipinas.
Sa idalom sang “No Permit, No Exam Prohibition Act” ukon Republic Act No. 11984, ginamanduan ang public and private schools nga pahanugutan ang mga estudyante nga wala pa nakabayad sang tuition kag iban pa nga balayran sa eskwelaha nga magkuha sang periodic kag final examinations apisar wala sang required permits.
Covered sini ang public and private basic (K to 12) institutions, higher education institutions, kag technical-vocational institutions (TVIs) nga nagatanyag sang long-term courses nga nagasobra sa isa ka tuig.
Sa sini man nga layi, katungdanan sang Department of Social Welfare and Development nga mag-isyu sang certificates sa makabig nga “disadvantaged students” agud ma-verify nga ini sila ang naga-eksperyensya sang kalamidad, emerhensya, force majeure, kag iban pa nga “good and justifiable reasons” sa idalom sang rules kag regulations nga i-set sang ahensya.
Mahimo makadagdag ang Department of Education, Commission on Higher Education, kag Technical Education and Skills Development Authority sang administrative sanctions sa mga eskwelahan nga magalapas sa sini nga layi.
Mangin epektibo ini 15 ka adlaw matapos ang publikasyon sa Official Gazette ukon sa general circulation.
Si Sen. Ramon “Bong” Revilla Jr. nga amo ang author sang hagna sa Senado amo ang nagsapubliko sang kopya sang layi nga nakasaad nga ginpirmahan ni President Ferdinand Marcos, Jr. sang Marso 11.#
