ILOILO CITY- Naglawig sang siyam ka oras bag-o dalayon nga napalong ang kalayo sa nagluntad nga sunog sa heritage buildings sa Iznart kag JM Basa Streets, Iloilo City Proper.
Natabo ang sunog sa ginbansagan ‘China town’ nga sakop sang Barangay Magsaysay.
Ang nasunog nga istruktura amo ang Divinagracia Building kag Celo Ledesma (Dominican Sister Building) nga lunsay totally burned.
Ang mga establishments naman nga ginlamon sang kalayo amo ang Emerald Finance Corporation, Touch Corner Mini Mart kag D&K Fashion Botique nga pareho nahamtang sa Divinagracia Building.
Sa interview sang Bombo Radyo Iloilo kay Fire Officer II John Paquito Verano, Fire Arson Investigator, iya ginpahayag nga nagsugod ang sunog pasado alas- onse kagab-i kag gindeklarar nga ‘fire- out’ alas-nuebe na sang aga.
Naglab-ot pa sa fourth alarm ang nasambit nga sunog.
Suno kay Verano, sa inisyal nga pagbanta, naglab-ot sa P8 million ang balor sang kahalitan.
Sa subong, padayon pa nga ginaimbestigaran ang ginhalinan sang kalayo.
