Sigurado na nga magapadayon pa ang pagginahum ni President Vladimir Putin sa Russia kasunod sang daku nga kadalag-an sa presidential elections apisar pa sang linibo nga nagtipon kag nagprotesta.
Nabulsa sang 71-anyos nga presidente ang 87.8% sang boto suno sa early results nga ginpaguwa sang pollster nga Public Opinion Foundation nga amo ang pinakamataas nga resulta sa presidential elections sa bug-os nga post-Soviet history sang amo nga pungsod.
Base naman sa Russian Public Opinion Research Centre, yara sa 87% ang nakuha ni Putin.
Buot silingon sini, may panibag-o nga anum ka tuig si Putin kag naghimo man sang maragtas bilang longest-serving leader sa amo nga pungsod.
Ang nagpangaduha kay Putin amo ang communist candidate nga si Nikolai Kharitonov nga naka-secure lamang sang 4% nga boto.
Si Putin nga anay lieutenant colonel sang Soviet Security, Intelligence, Espionage ang una nga nakilala kag nakaangkon sang gahum sang 1999.
Wala man ini sang ginalauman nga daku nga pagpanghangkat sa termino bangud kalabanan sa opposition candidates ang napatay na, napreso, gintapok sa iban nga mga lugar, ukon gindumilian nga magpadalagan.
Ang pinakaulihi amo si Alexey Navalny, ang pinakadaku nga kritiko ni Putin nga gulpyada lamang nga napatay samtang yara sa sulod sang presuhan sang nagligad nga bulan.
Ini nga kadalag-an ni Putin ang natabo duha ka tuig halin sang ginmandu sini ang pagsalakay sa Ukraine nga amo man ang ginakabig pinakamakamamatay nga away sa bilog nga Europa halin sang World War II.#
