Nag-promisa si Senator Robinhood Padilla nga iduso gid ang hagna nga nagatuyo nga ideklarar ang Hulyo 27 bilang special non-working holiday agud i-komemorar ang kontribusyon sang Iglesia Ni Cristo sa pungsod.
Ginhimo ni Padilla ini nga promisa kadungan sang deliberasyon sang ginapangunahan sini nga Senate Committee on Constitutional Amendments and Revision of Codes, Marso 18.
Nakaplastar ang duha ka separado nga hagna agud nga pabaloran ang founding anniversary sang amo nga religious organization — una, ang Senate Bill No. 1087 nga gin-file ni Senator Jinggoy Estrada agud himuon nga “special working holiday” ang amo nga adlaw; kag ang ikaduha amo ang Senate Bill No. 1546 nga gin-file naman ni Senator Bong Revilla agud himuon nga “special non-working holiday” ang amo man nga petsa.
Kun ang holiday madeklarar nga isa ka “special working,” buot silingon sini, ang employees ang maga-report sa trabaho apang makakuha sang additional 30% sang ila nga daily rate; samtang kun ang holiday naman isa ka “special non-working,” indi na kinahanglan mag-obra pa ang empleyado apang makakuha sang additional 100% sang daily rate.
Mas gusto ni Padilla ang hagna ni Senator Revilla kun sa diin pananglitan mapatuman, kinahanglan ini sundon sang employers bisan myembro sang Iglesia ni Cristo ang ila nga mga empleyado ukon indi.
“Nasaksihan ko po ang very godly mission ng INC hindi lang po sa Kristiyanong komunidad kundi maging sa mga Muslim,” suno sa senador.
Padayunon pa ang diskusyon sa amo nga hagna kaangay sa ginsiling ni Labor Undersecretary Felipe Ecargo Jr. nga dapat nga may balanse sa benepisyo sang workers sa holiday kag sa pagkinahanglan nga ma-maintain ang manami nga imahe sang pungsod sa mga investors.
Sa pihak nga bahin, nagsuhestyon naman ang Department of the Interior and Local Government paagi kay Asec. Romeo Benitez nga magluwas sa pagkomemorar sa founding anniversary sang INC, dapat nga nakasaad man sa layi ang recognition sang kontribusyon sang amo nga organisasyon sa bug-os nga mga Pilipino kag sa sosyunad.
Si Padilla amo ang nagpanguna sa 2022 senatorial race kag isa man sa mga gin-endorso sang Iglesia ni Cristo sang tion nga siya ang nagpadalagan.
Suno sa Philippine Statistics Authority Report on Religious Affiliation sa 2020 Census of Population and Housing, ang INC amo ang third largest religious affinity sa Pilipinas nga may masobra 2.8 million membership.#
