Patay ang mag-asawa nga Pinoy matapos nalumos samtang nagapangisda sa Australia.
Ang mga biktima ang ginkilala nga sanday Jun Ballo, tumandok sang Ilocos kag asawa nga si Leslie, tumandok sang Bangued, Abra.
Sandig sa report, ginpahibalo sa pulis ang pagkadula sang duha sang nagligad nga semana bangud wala ang mga ini nakabalik halin sa ila nga pagpangisda.
Nakit-an sang otoridad ang salakyan sang duha sa Herron Point Boat Ramp apang wala na sang fishing gear.
Sunod nga nasapwan ang lawas sang mga biktima sa Peel Estuary nga ginapahayag 30 kilometers south sang Mandurah sa Perth sang Marso 14.
Wala sang ginasuspetsahan nga foul play sa amo nga insidente apang nagapadayon pa ang imbestigasyon nga ginahimo sang Western Australia Police.
24 ka tuig na nga mag-asawahay ang duha kag nakapatigayon pa sang renewal sang ila wedding vows duha ka semana antes natabo ang insidente.
Bangud sa hitabo, nailo ang ila isahanon nga 13-anyos nga anak nga babayi.#
