Nag-resign ang presidente sang Vietnam nga si Vo Van Thuong apisar nga wala pa natuigan ang pag-uyat sini sang amo nga posisyon sa amo nga pungsod.
Si Thuong amo ang ikaduha nga presidente nga nagpanaog sa posisyon sa sulod lamang sang duha ka tuig sa tunga sang anticorruption crackdown nga amo man ang rason kun ngaa ginpahalin kag ginpangkasuhan anay ang pila ka senior politicians kag dalagku nga business leaders.
Kilala man ang amo nga presidente nga suod kay General Secretary Nguyen Phu Trong nga amo ang most powerful figure kag main architect sang anti-graft campaign sa amo nga pungsod.
Suno sa Vietnamese Communist Party, ginbaton na sang Central Party Committee ang resignation sang presidente bangud sang wala pa nadetalye nga mga paglapas kag sala sini sa reputasyon sang partido.
Matandaan nga sang nagligad nga tuig, masobra isa ka bulan matapos nag-resign si former president Nguyen Xuan Phuc bangud man sang violations, si Thuong amo ang gin-appoint nga successor.#
