Talalupangdon ang paglaktaw ni Pope Francis sa pagbasa sang iya homily kadungan sang Palm Sunday Mass sa atubang sang linibo ka mga tumuluo sa St. Peter’s Square sa Vatican.
Isa ini ka indi kinaandan nga hitabo kun sa diin wala gindayon sang Santo Papa ang homily sa isa ka daku nga event kaangay sang Domingo de Ramos.
Last minute na ang desisyon sang 87-anyos nga Santo Papa bangud antes pa man ang misa, may preparado na nga kopya sang homily nga napanagtag sa journalists. Sang ginpresentar naman sang aide si Pope Francis agud magsugod na sa pagbasa, ginklaro sini nga indi siya mag-deliver sang homily rason sang paghipos sang mga tawo.
Wala gilayon ginpaathag sang Vatican kun ano ang natabo apang sang ulihi, nagsiling ang Vatican press office nga ang homily ang gin-islan sang “moment of silence and prayer.”
Wala man nagpartisipar ang Santo Papa sa prusisyon sang mga cardinals sa palibot sang obelisk sa piazza sang nagsugod ang misa kundi nagbendisyon lamang samng mga ramos samtang nga yara siya sa altar.
Sa hingapusan sang misa, gin-deliver man sini ang iya nga Sunday Angelus message kag blessing.May ginhalad man nga pangamuyo si Pope Francis kag nag-apelar man sang kalinong kun sa diin na-mensyonar sini ang pagpang-atake sa concert hall sa Russia. Naghingyo man ini sang pangamuyo para sa Ukraine kag sa mga tawo sa Gaza.
Ang Palm Sunday amo man ang panugod sang masako nga semana para sa Santo Papa nga magalawig tubtub sa Easter Sunday ukon sa Adlaw sang Pagkabanhaw.
Sa Huwebes, magabyahe ang Santo Papa sa presuhan sang mga babaye sa Roma para sa tradisyonal nga paghugas sang tiil.
Sa Byernes, natalana man ini nga mag-preside sa Way of the Cross procession sa Colosseum sa Roma kun sa diin iga-reenact ang paglansang kay Hesus sa Krus.
Sa Sabado, magapanguna man ang Santo Papa sa nighttime service sa basilica kag pagasundan sang Easter Sunday Mass sa St. Peter’s Square kag ang iya blessing sa udto.
Ini nga masako nga semana ang ginalantaw man nga isa ka daku nga pagtilaw sa ikaayong lawas ni Pope Francis na una na nagsuprer sang bronchitis kag influenza.#
AP Photo/Alessandra Tarantino
