Patas lang ang kainit sang ulo sang mga residente sa kapaang nga nabatyagan sang liwat nga nagluntad ang power interruption sa pila ka banwa sa probinsya sang Iloilo amo man sa pila ka areas diri sa Iloilo City.
Nagsugod ini pasado ‘las dies kagab-i kun sa diin ang ginatudlo nga rason sa probinsya amo ang nasunog nga crossarm sang National Grid Corporation of the Philippines (NGCP) facility sa Barangay Parara Sur, Tigbauan.
Lakip sa apektado nga mga banwa amo ang Alimodian, Cabatuan, Guimbal, Igbaras, Leon, Maasin, Miagao, Oton, San Joaquin, San Miguel, Tigbauan , Tubungan, porsyon sang Pavia, kag Sta. Barbara.
Sa latest update sang NGCP, ginpahayag nga nabalik na tanan nga power transmission services sa probinsya 3:41 kaina sang kaagahon.
Sa syudad sang Iloilo naman, may mga portion nga nag-brownout pasado 10:00 sa gab-i kag nagbalik malapit na ‘las dos sa kaagahon. Ginahibalo pa ang rason sang natabo nga power interruption.#
(Photo: Iloilo I Electric Cooperative, Inc.)
