ILOILO CITY- Nagsaka pa sa siyam ang numero sang mga napatay sa magnitude 7.5 nga linog nga nag-igo sa Taiwan.
Suno sa Taiwan’s National Fire Agency, magluwas sa mga napatay, masobra 900 naman ang nagkalapilasan sa pinakamabaskog nga linog sa Taiwan sa sulod sang 25 ka tuig.
Wala naman gindetalye sang ahensya kun ano kalala ang mga injuries.
Ang mga napatay ang lunsay naghalin sa Hualien County kun sa diin kalakip diri amo ang tatlo ka hikers nga nadagdagan sang nagkalahulog ngaa mga bato sa tourist hotspot nga Taroko Gorge.
Isa man ka truck driver ang patay sang nahulugan man sang mga bato sa tunnel sa Suhua Highway.
Suno naman kay Bombo Jean Villa Vergara, tumandok sang Balanac, Janiuay kag international correspondent sa Taiwan, nagpaandam ang Taiwan Central Weather Administration sa posible pagluntad sang mabaskog nga aftershocks nga magalab- ot sa magnitude 7 tubtob sa katapusan sang semana.
Ginpakigbahin man niya ang tuman ka makahaladlok nga eksperyensiya sang tion sang linog kun sa diin nagpangamuyo na lang ini agud maluwas sa katalagman.
