ILOILO CITY- Nanindugan ang Iloilo City Drug Enforcement Unit nga wala sang may natabo nga pagpangtaya sang pusil sa ginpatigayon nga operasyon sa Zone 13, Calaparan, Arevalo, Iloilo City.
Ang subject amo si Crisande Duremdes, apang nakapalagyo.
Nadakpan naman ang upod sini nga si Alyas Jay kag nakuhaan sang 30 grams sang shabu nga nagabalor sang P300,000 tubtub P400,000.
Sa amo nga operasyon, gin-alegar ni Narica Duremdes, iloy ni Crisande, nga nakibot na lang sila sang ginsulod sang mga otoridad ang ila balay pinaagi sa pagsipa sang ila pirtahan kag ginpangtayaan sila sang mga pusil.
Sa interview sang Bombo Radyo kay Police Lieutenant Colonel Antonio Benitez Jr., pinuno sang Iloilo City Drug Enforcement Unit, iya ginpahayag nga standard operating procedure sang otoridad kun nagapatigayon sang kaangay nga operasyon amo nga uyatan gid ang armas agud preparado ang mga ini sa tion nga may matabo nga aggression.
Suno kay Benitez, posible nga namisinterpret lamang ini sang mga tagreklamo.
Sa alegasyon naman sang iloy nga Duremdes nga ginpangkuha man sang mga katapo sang Iloilo City Drug Enforcement Unit ang ila bag nga may wallet nga nagaunod sang kantidad nga 150,000 kag mga alahas nga nagabalor sang P100,000, ginpahayag ni Benitez nga iya ini imbestigaran kag siya mismo ang magapasaka sang kaso sa ila personnel kun mapamatud-an nga may ginhimo ini nga iregularidad sa amo nga operasyon.
Dugang pa ni Benitez, recorded man sa mga bodyworn camera sang mga operatiba ang operasyon kag kun makit-an nga may kamatuoran ang alegasyon sang pamilya sang subject, indi ini pagpalampuwason ni Benitez.
Sa bahin naman sang pamunuan sang Iloilo City Police Office, ginpahayag ni Police Colonel Joeresty Coronica,city director, nga bukas ang ila opisina kun luyag magpasaka sang pormal nga panumbungon ang mga tagreklamo.
