Ginkumpirma ni Indian Prime Minister Narendra Modi nga nadul-ong na sa Pilipinas ang BrahMos supersonic cruise missiles nga ginakabig nga “game changer” para sa pagpabaskog sang suporta sa kadagatan sang pungsod.
Sandig sa inisyal nga report, na-deliver ang missile system sa Philippine Marine Corps sang Byernes samtang napadala naman sang nagligad nga bulan ang ground system.
Suno kay National Security Council Assistant Director General Jonathan Malaya, ang maximum extent sa range sang sini nga missile ang nagalapaw pa sa West Philippine Sea — buot silingon, pananglitan nga may makit-an nga magsulod sa teritoryo ukon sa exclusive economic zone sang Pilipinas kag makabig nga pagpamahog, puwede ini nga ma-igu sang BrahMos missile.
Universal man ini para sa nagkalain-lain nga platforms kag mahimo mapalupad halin sa air, land, kag sea platforms. Nagagana man ini sandig sa ‘Fire and Forget principle’, buot silingon, wala na nagakinahanglan sang guidance kun ini ang mapalupad na kag mapabilin sini ang high supersonic sa bilog nga flight.
Ginklaro man ni Malaya nga indi ini preparasyon sa gyera.
May pila na ka baterya nga mahimo gamiton sa BrahMos cruise missile suno sa iya kag iga-deploy ini sang Philippine Marines.
Sang Enero 2022, matandaan nga ang Duterte administration paagi kay anay Defense Secretary Delfin Lorenzana ang nagpirma sang kontrata para makabakal sining shore-based anti-ship missile system sa balor nga P18.9 billion.
Ang kontrata sa BrahMos Aerospace nga joint venture sa tunga sang India kag Russia ang naga-involve sang tatlo ka batteries, training sa operators kag maintainers, amo man ang logistics support. #
