ILOILO CITY- Tuman ang pagpasalamat sang mga residente sang Zamora- Melliza, Iloilo City Proper sa Bombo Radyo Philippines Foundation, Incorporated kag Flowater Resources Iloilo, Incorporated sa paghatag sang potable water ukon matinlo nga mainom nga tubig.
Sa interview sang Bombo Radyo Iloilo kay Kagawad Yuri Villanueva, chairman sang Barangay Disaster Risk Reduction and Management Committee, iya ginpahayag nga dako nga bulig ang nabaton nila nga tubig ilabi na sa mga pamilya nga lubos nga apektado.
Suno kay Villanueva, kapin 1000 ka indibidwal ang una nga batch sang benepisyaryo.
Dako nga pasalamat man nila bangud magluwas sa libre nga tubig, nahatagan pa sila sang water tank nga amo ang butangan sang mainom nga tubig para sa ila nga mga residente.
Nahibaluan nga kabilugan nga 10,000 cubic meters ukon 10 million liters sang ilimnon nga tubig ang ipanghatag sa syudad halin sa Flowater Resources Iloilo Incorporated.
