ILOILO CITY- Ginpasakaan na sang kaso ang duha ka mga indibidwal nga nakuhaan sang masobra 7 million pesos nga balor sang ginapatihan shabu sa ginpatigayon nga buy bust operation sang Regional Police Drug Enforcement Unit 6 sa Brgy. Cabugao Sur, Sta. Barbara, Iloilo.
Ang mga nadakpan amo sanday alyas Fernan, 38, residente sang Brgy. Tanza Timawa, City Proper, kag bouncer sa isa ka bar sa Iloilo City, kag si alyas Bryan, 30, residente sang Brgy. Camambugan, Sta. Barbara, Iloilo, isa ka call center agent.
Sa interview sang Bombo Radyo kay Police Captain Ryan Christ Inot, Team Leader sang amo nga unit, iya ginpahayag nga kaso nga paglapas sa Republic Act 9165 ukon Comprehensive Dangerous Drugs Act of 2002 kag Republic Act 10591 ukon Comprehensive Firearms and Ammunition Regulation Act ang ginpasaka batok sa duha ka arestado nga ginakabig nga mga High Value Individuals.
Magluwas sa iligal nga druga, nakuhaan ang mga ini sang isa ka unit sang 357 caliber pistol kag tatlo ka live ammunition.
Suno kay Inot, madugay na nila gina-monitor ang duha bangud konektado ang mga ini sa isa ka drug personality nga una na nga nadakpan sadto.
Dugang ni Inot, si Byran ang napreso naman sang una bangud sa kaangtanan sini sa isa ka robbery holdup sa Antique.
Nahibaluan ng narekober man sang otoridad ang mga dalagko nga putos sang suspected shabu nga may label sang mga tawo nga banwa nga ginapatihan amo ang ginadal-an sang iligal nga druga sang duha.
