ILOILO CITY- Ginalantaw sang Iloilo City Government nga masuguran na sa Mayo 10 ang pagdeliver sang gin-procure nga tubig para sa mga pumuluyo sang syudad.
Ini may kaangtanan sa pagpaidalom sa syudad sa state of calamity bangud sa El Niño phenomenon.
Sa interview sang Bombo Radyo kay Engr. Neil Ravena,head sang General Services Office, iya ginpahayag 696 cubic meters per day ang gin-commit nga ma-distribute kag amo man ang requirement–30% ang halin sa Metro Pacific Iloilo Water kag 70% ang halin sa South Balibago Water Works.
Nahibaluan nga ang duha ka kompaniya lang ang nagpasakop sa bidding para sa procurement sang tubig.
Suno kay Ravena, ang isa lamang ka concern amo nga ang South Balibago ang wala sang magagmay nga water tankers nga sarang makasulod sa mga lugar nga may makitid nga dalan apang napangitaan na ini sang paagi.
