Patay ang isa ka lalaki nga driver matapos ginbunggo sini ang ginamaneho nga salakyan sa gate sang White House sa Washington, D.C. sa Estados Unidos sang Amerika.
Suno sa U.S. Secret Service, 10:30 p.m. (oras sa state) sang natabo ang insidente kun sa diin nakit-an pa nga tuman ka dasig ang dalagan sang salakyan antes ang collision sa perimeter gate sa White House complex.
Nag-abot ang otoridad sa area agud nga mabuligan ang wala ginpangalanan nga driver apang ginbawian gid ini sang kabuhi.
Naglunsar na sang imbestigasyon ang Secret Service kaupod ang police kag fire departments sang District of Columbia kasunod sang fatal crash.
Ginpahayag man ni Secret Service spokesman Anthony Guglielmi nga apisar sang hitabo, wala sang nakit-an nga threat sa public safety.
Sang Enero, matandaan nga may gin-detain man ang otoridad nga isa ka tawo matapos nga ginbunggo man sini ang salakyan sa exterior gate sa amo man nga complex. May sunod-sunod nga high-profile trespassing incidents sa White House sa sulod na sang pila ka tuig nga amo ang rason sang pagtukod sang mas mataas kag mas mabakod nga metal fence sa palibot sang iconic mansion sang 2020.
