ILOILO CITY- Gin-ako ni Governor Arthur Defensor Jr. nga may ara sang mangin conflict sa tion nga magbungguanay sanday Iloilo City Lone District Representative Julienne Jamjam Baronda kag Ms. Raisa Treñas-Chu pagkatapos sang alyansa nga natabo sa tunga sang Partido Federal ng Pilipinas kag Lakas-Christian Muslim Democrats.
Opisyal na nga nagsulod si Baronda sa Lakas- CMD nga ginsundan naman sang pagpirmahanay sang alyansa sa tunga sang Partido Federal ng Pilipinas kag Lakas- CMD.
Ginalauman naman nga magsumpa si Treñas- Chu sa Partido Federal ng Pilipinas.
Sa interview sang Bombo Radyo kay Governor Arthur Defensor Jr., iya ginpahayag nga istoryahan sa sulod sang partido ang dynamics nga matabo pagkatapos nga nakapirmahanay sang alyansa.
Suno kay Governor Defensor Jr. nga nagaserbe naman nga regional head sang Partido Federal ng Pilipinas, gintugyan ni President Bongbong Marcos kay Governor Jun Tamayo sang South Cotabato nga mag-uyat sang komitiba para maresolba ang conflict sa tunga sang mga partido nga may yara sang magapadalagan sa pareho nga mga posisyon.
Ginkumpirma naman sang gobernador nga madayon sa gihapon ang pagpanumpa ni Ms. Raisa Treñas-Chu sa idalom sang Partido Federal ng Pilipinas.
Dugang pa sang natungdan, nahulat nalang nga makaplastar sang schedule subong nga Mayo para makapanumpa ang mga local officials diri sa Iloilo.
