ILOILO CITY- Ginalantaw sang Municipal Agriculture Office sang Janiuay, Iloilo nga mga layaw nga sapat kaangay sang ido kag singgarong ang responsable sa kamatayon sang mga pabo kag pato sa isa ka barangay sa amo nga banwa.
Sa interview sang Bombo Radyo kay Alrey Adurante, head sang Municipal Agriculture Office, iya ginpahayag nga base sa ila paglantaw sa napatay nga mga sapat, agi ini sang kagat sang ido.
Suno kay Adurante, ipaidalom sa gihapon nila sa test ang napatay nga mga sapat agud mapat-ud gid kun ano nga sapat gid man ang may kahimuan.
Pahayag niya, ini agud nga mapaandaman man ang mga pumuluyo para sa proteksyon sang ila mga hinuptanan nga sapat kag indi na ini masulit pa.
Gin-athag nman ni Adurante nga indi aswang ang tinuga sa likod sang kamatayon sang nasambit nga mga sapat.
